Dening Sulismanto*
Perang karo utusan saka Pringgondani, Patih Gandamana kejegur sumur upas. Ora nulungi, Harya Suman malah ngutus balane ngrutug watu saka ndhuwur. Nalika sowan nglapurake kekadeyan iku ring ngarsane Prabu Pandhu Dewanata, sang prabu emoh suwe-suwe Ngastina ora duwe patih. Harya Suman diwisuda dadi patih anyar.
Marem atine Harya Suman entuk kalungguhan sing wis suwe dadi panjangkane. Kamangka lumantar hoaks. Sabenere Patih Gandamana durung mati. Suman gampang gawe hoaks patine Gandamana merga pancen wis kondhang sak-Ngastina, nek sapa wae sing kejegur sumur upas ora isa slamet.
Patih Gandamana sing ketulungan, balik ring Ngastina, ngajar Harya Suman sing wis gawe hoaks. Diajar entek-amek, pasuryane Suman rusak, banjur nganti diundang Sengkuni. Merga kabeh mau dijalari hoaks-e dhewe. Sebabe sangka unine (omongane) dhewe. Sangka uni, dadi Sangkuni. Mukane diundang Sengkuni.
Kaya ndhok wayang, ora kurang wong sing njarak gawe hoaks. Gawe pawarta palsu supaya isa nggayuh kekarepane. Apa maneh nek kuwi pulitik perkara kalungguhan.
Mbuh merga wis dituturi kawit mbiyen lumantar wayang, mbuh merga sebab liyane, masarakat saiki ora preduli janji pulitik. Wis dha ra kudu nagih janji pulitik nalika politisi wis entuk kalungguhan. Cacahe nganti 85 persen. Iku angka sing ditemu saka Survei Perilaku Politik Pemilih dan Political Linkage di Yogyakarta dan Magelang taun 2014 dening JPP Universitas Gadjah Mada (JPP UGM).
Apa le dha ora kudu nagih janji pulitik iku ana gandheng-cenenge karo kasunyatan sing ketok ndhok dhaerah pemilihane dhewe-dhewe? Masarakat sing reti. Gek ape pemilu dha janji piye, terus kasunyatane piye.
Ning kahanan ngono iku aja ndadekake awake dhewe aras-arasen melu nggunakake swara nalika ana pilihan pulitik, kalebu kiyam petinggi. Nek pengin desane dhewe selot maju, ayo melu milih. Coblosen calon sing paling apik. Survei mau taun 2014 ndhok Yogyakarta lan Magelang, kok. Enggoh saiki ana kasunyatan ndhok dhaerahe dhewe sing pada karo temuan survei, ora teges kabeh politisi ora isa ditagih janjine. Ora teges kabeh kontestan ra kena dipercaya.
Janji pulitik wujud visi-misi calon, pancen ora selawase isa langsung diseleh ndhok panjangka pembangunan desa (rencana pembangunan desa), banjur mlebu Anggaran Pendapatan dan Belanja Desa (APBDes). Kaya dene rongtaun iki.
Petinggi ra isa ngatur dhuit saksenenge dhewe. Nyatane ora raja cilik ndhok tanah perdhikan. Anggone gawe APBDes kudu anut aturan saka pamarintah sing ngucurake Dana Desa (DD). Rong taun iki, dhuit DD kena-kenaa entek dhes merga Covid-19. Sisa sing isa kanggo nglebokake program pembangunan saka visi-misi ring APBDes, wis ora mbejaji.
Taun 2022 contone, 40 persen DD kudu kanggo bansos BLT DD, 20 persen kanggo program ketahanan pangan, lan 8 persen kanggo nyengkuyung penanganan Covid-19. Karek 32 persen sing kanggo program prioritas liyane. Ngono iku diatur langsung nganggo Peraturan Presiden (Perpres). Iku wae tah 2022 sing jare pandhemi wis lebar. Meneh kok taun 2021. Mulane kaya ra ana pembangunan fisik blas ra?
Merga visi-misi durung mesthi isa gage-gage mlebu APBDes, lek masarakat jebul wis dha ora kudu nagih janji kampanye, sah-sah wae nek ana sing nguwatiri calon dha selot gampang manis-manisan janji pas kampanye. Selot gampang mblithuki, tanpa niat nyembadani janjine.
Apa maneh pas awitan reformasi kae, wong gedhe-gedhe le dha ngajari wong cilik supaya gelem milih kerana gagasan. Kon milih calon sing visi-misine apik, sing pinter gawe gagasan. Ha nek ngono rak ndhung calon dha apik-apikan kedhok? Sing pinter sya dha gampang mblithuki?
Lha pemilih sing wis mamula ra preduli gagasan, ra preduli kepinterane calon, malah le dha milih merga jalaran isi amplop. Sing sabete pinter nggolek uwong, sing dhuite mberah, isa kepilih. Terus nek wis dadi, peng-pengan le golek pulihan.
Kuwatir kahanan ngene iki kok terus ora gelem melu milih, ya malah nggampangake calon sing elek kepilih, ah. Mesakke desane. Angel majune.
Isih akih cara liya kanggo nyaring calon pemimpin sing apik.
Dhawuhe para ngalim, adab-akhlak kuwi sandhuwure ilmu. Pilih wae sing paling apik akhlake. Nek morale apik, terus loman, lek malah mamula pinter sisan, kuwi bonus.
Jarene, watak kuwi dudu watuk. Nek watuk isa ditambani, nanging nek watak ora! Calon sing kawit mbiyen kulina mikir lingkungan, ora eman kodhol bandhane kanggo mbangun, kulina loman ring uwong, pas dadi petinggi mesthine bakal tetep ngono. Mikir pembangunan desane. Apa maneh iki ora nganggo dhuite dhewe.
Nek kulinane mbesiwit, kethuk, kok setaun-rong taun ujug-ujug loman, kuwi kedhok. Engko nek wis menang kiyam, kethuk meneh. Apamaneh kok nek selawase wis kethuk, ijik delap sisan. Senajan nyebar amplop isine kandel pitung senti ucap-ucapane, mamula aja dipilih!
Saringan sabanjure, kapinterane mbangun jaringan. Jaringan ring pamarintah lan anggota dhewan, mbuh iku DPRD mbuh DPR RI.
Rong taun iki nalika DD entek dhes perkara Covid-19, desa sing petinggine ra isa mbangun jaringan, ya ancen ra ana pembangunan blas. Kamangka nek pinter, isa gawe proposal supaya entuk alokasi bantuwan saka pamarintah. Ndhung mamula ana pembangunan sing sumbere dudu DD.
Nek pinter mbangun jaringan karo anggota dhewan, ya isa entuk pembangunan pirang-pirang enggon. Merga salah sijine fungsi dhewan mono fungsi anggaran (budgetting). Petinggi sing raket karo anggota dhewan partai ika-iki, aspirasi pembangunan saka rakyat ndhok desane luwih gampang kawujud.
Gampange ngene. Saka fungsi anggaran mau, anggota dhewan ora arep nyetujoni APBD nek usulan aspirasi saka petinggi kenalane durung dianggarake. Mulane penting duwe petinggi sing kenal anggota dhewan pirang-pirang, saka partai ngendi-ngendi.
Isih ana meneh liyane, kaya dene kebisanane handayani masyarakat swadaya mbangun lingkungan. Nek wong kulina loman gelem thuthukan kanggo mbangun lingkungan—sing durung ia dicukupi pamarinta,—mesthine nalika wis menang kiyam, mamula ra gampang eman. Masarakat ndhung ewuh nek ra melu urunan kanggo mbangun.
Wis entuk saringan 3: yaiku watake calon, kepinterane mbangun jaringan, lan handayani swadaya masarakat.
Para maos kagungan saringan sacandhake? Kaya ta kreativitas lan transparansi nalika nyekel dhuit masarakat? Iku apik. Nek mbiyen mbedinane nggelapake dhuit urunan, bahaya!
Ayo, saringan-saringan mau digunakake kanggo milih calon sing apik. Aja keblithuk kedhok, aja perkara dhuit, aja gampang ngandel hoaks calon sing ngapik-apik awake pas pencalonan.
Kaya Sengkuni mau. Merga duwe gegayuhan dadi patih, anggone hoaks nganti nyebabake perang antarane Ngastina karo Pringgondani. Prabu Pandhu Dewanata lan Ratu Pringgondani Prabu Trembaka sing wujud raseksa, gugur kabeh ndhok palagan. Kamangka Trembaka mono murid sing karepe ape ndudohna bekti marang gurune, Prabu Pandhu Dewanata.
Ha nek gara-gara kepangan hoaks calon terus desane ora sida maju piye? Kamangka petinggi samangsa tah suwene 6 taun. Apamaneh nek kepilih ping 3. Ha rak kojur?
Nuwun.
*Sulismanto, warga Jepara.
