R. Widiyartono
Maskumambang Wengi Wening
Wengi wening
Godhong-godhong garing
Tumiba ing plataran wingking
Katon Kenya sapandhurat liwat
Ngagem nyamping
Lan rausak sarwa pethak
Ngindhit klenthing
Tembang maskumambang
Alon-alon sumiyut ngumandhang
Nylusup ing tengahing kebon gedhang
Saking kori wingking
Pun wanodya kuru aking
Lumebet nuju mring
Senthong mamring
: o, alah thole
Geneya nasibmu mengkene
Ramamu priyagung jumangkung
Nanging tan pantes peputra
Dikaya awakmu
Sebab kepriye wae
Kowe iki ya mung anak babu
Sm. 090596
Swaraning Pandom Jam Tembok
Coba ta yen kok ematna
Obahe pandom jam tembok
Ora mung nuduhake
Iki wanci jam pira
Coba ta yen kok ematna
Swarane kang kadya ngiris-ngiris
Kepara njuwing-njuwing
Batin lan rasa kita
Swarane pandom jam tembok
Kaya-kaya nyeret lunga
Ninggalake kaendahan ndonya
Nuju panggonan
kang kebak kasampurnan
Swarane pandom jam tembok
Kaya nglethak-nglethaka
Cumplungin mustaka
Kang say suwe
Pancen saya tanpa daya
Sm. 210597
Ri Brandhil
Ngliwati kebon-kebon kopi duweke negara
Kebon karet, kopi, klapa
Njajahi dalan neng ndesa-ndesa
Tegal sing ditanduri sarwa pala
Duren, jeruk, kokosan, dhuku
Ketemu persil bera
Sukete rungkut ndadra
Wit-witane kopen ra tau diupakara
Ing kabeh panggonan mau
Sing tak temoni padha
Ri brandhil dipsang ngubengi
Ing sawatesing persil kebon lan etagalan
Ri brandhil dipaku ing pathok-pathok kayu
Kanggo ngendheg laku
Sing sapa arep laku durjanan
Utawa kewan-kewan ama tanduran
Tanduran iku diupakara diopeni
Supaya awih kasil nalika dipaneni
Aja nganti dicolong maling
Aja nganti ketekan ama
Genjik, lwak, utawa bajing
Uga kewan iwen wedhus, kebo, sapi
Kuwi crita dhek jaman semana
Ri brandhil akeh ditemokake ing desa-desa
Nanging beda karo saiki
Ri brandhil dipasang ing tengah kutha
Dimot prahoto didhunke ing dalan bawera
Dipasang nganggo ngalangi soksapaa
Sing dinuga rep tindak culika
Saora-orane kanggo njaga
Kareben ora ana rubeda
Ri brandhil dipasang kanggo ngalangi
Dalan nuju gubernuran
Dalan nuju balekota
Dalan nuju kantor KPU
Dalan nuju kantor Bawaslu
Iki wohing demokrasi
Ri brandhil dipasang ora kanggo ngalangi
Maling sing arep nyolong woh-wohan
Ri brandhil dipasang kanggo ngalangi
Wong sing kurang marem ing ati
Nyawang kahanan saiki
Ri brandhil uga nahan
Wong-wong sing aneh dijak rembugan
Ri brandhil ing dina iki
Pancen bisa ngalangi massa
Sing nuju KPU utawa Bawaslu
Nanging ri brandhil ra bisa ngalangi
Drengkining ati
Mula kulit katembus mimis
Montor-montor diobong
Kutha mengangah ing pucuking Romadon
Apa iki jeneng ibadah?
Gusti mugi paring apura
Mergi tetiyang menika pancen
Mboten mangertosi
Bab menapa ingkang dipunlampahi
Sm. 22 Mei 2019
R. Widiyartono, penulis dan wartawan suarabaru.id.
