Dening Sulismanto*
Ketoke, lagek pisan iki penyanyi dangdut Lèsti Kêjora nggawe kuciwa. Tapi bareng nguciwani, sing getun ora penggemare (pandhemene) enthok. Warganet sak Indonesia, kena-kenaa rumangsa kena prank kabeh.
Kawit lapuran pulisi merga dadi korban KDRT (kekerasan dalam rumah tangga), warganet ndhung dha reti nek sakbenere, Lèsti Kêjora nandang sengsara sajrone omah-omah karo Rizky Billar. Setaun bebojoan, Lèsti ora pisan-pindho dipilara.
Jane iku teka sek kepiye nek ditulis. Tapi lek piye meneh wong lah jelas.
Katrangane Polda Metro Jaya, Lèsti bolak-balik dianiaya, ditekak nganti dibanting. Sing paling prana, kaya video rekaman CCTV sing sumebar iku a, ape diantem bal biliar. Tujune wae kok, sing ape nyawat kepleset, ndhung orak kena. Lha nek upama kena sirah lo piye, ngono? Bal biliar mono tah atom sing dipadhetake. Abote isa nganti 3,5 ons. Wis ngono, le ape disawat jebul pas Lèsti mbobot gedhe. Lho kok tega?
Merga perkara KDRT lek ancen sliweran ndhok medhia, warganet sing janjane ora patek seneng infotainment, sidane dha melu nggatekake. Anggone Lèsti wani lapur pulisi, isa dadi tuladha nek korban KDRT pancen kudu wani nyuwara. Wong sing nglakoni KDRT kudu entuk paukuman lah kapok.
Eh, bareng disengkuyung warganet, lha kok ujug-ujug lapurane dijabut. Rizky Billar sing wis nganggo klambi tahanan dirangkul, diapura. Lèsti ngandel nek Rizky Billar wis kapok, ra bakal mbaleni kasar milara.
Ana sing nganti mbandhingake Lèsti Kêjora karo Ayu Ting Ting, sing wani lan kebukti rosa nglakoni dadi single parent, malah kawit Ayu Ting Ting mbobot.
Psikolog forensik Universitas Indonesia (UI) Kasandra Putranta ngandharake, KDRT umume merga salah siji pasangan bebojoan, rumangsa duwe hak nguwasani pasangane. Malah ana sing nganti “menikmati” nggunakake kekuwatane nggo milara pasangan. Teori iku kaya sing dipethik Republika ndhok pawarta tanggal 11 Oktober 2022.
Wong sing gawene nglakoni KDRT, umume modhel nyalahgunakake pangapuran. Ra preduli wis bar nganti dilapurake pulisi barang.
Psikolog lulusan UI Rosdiana Setyaningrum nyambungi, wong modhel ngene iki, ketoke kaya entek ngamek olehe getun nek bar KDRT. Tapi engko nek wis ilang getune, ya dibaleni meneh le milara bojo. Ana perkara sithik wae ya langsung mak peng ah!
Ya iki sing dikuwatiri warga. Mulane sing maune sek nangisi Lèsti, nganti ana sing kelangan simpati.
Ndhok tengahe bebrayan, sakbenere “Lèsti Kêjora” sing malah luwih prana ana pirang-pirang. Saora-orane Lèsti Kêjora tau usaha ngehi “pelajaran” karo lapuran pulisi.
Nanging Lesti-Lesti tanggane dhewe, meh kabeh dha milih meneng, mertahan le omah-omah senajan terus-terusan dadi korban KDRT. Paling-paling mung ndedonga.
Ana 7 faktor sing nyebabi dha milih mertahan senajan terus-terusan dadi korban KDRT, kaya sing dibeber ndhok jurnal ilmiah “Memahami Alasan Perempuan Bertahan dalam Kerasan Domestik” lenliti Zakiyah Segaf sakanca saka Universitas Muhammadiyah Jember.
Faktor nomer siji, wedi piwalese wong lanang, uga diincem reka-reka. Nomer loro, merga ekonomine gumantung wong lanang, ndhung ra duwe pilihan liya senajan uripe sengsara dipilara terus. Sing iki separan-paran mberah.
Nomer telu, wedi diomong elek. Akeh wong wedok sing keweden dicap wong ora apik, merga mbendina dadi korban KDRT. Wis ngono, ora siyap nampa status sosial randha merga masarakat nganggep randha kuwi status sosiale cendhek. Maju-mundur salah.
Faktor nomer papat, ora precaya ring awake dhewe merga saking mbendinane dipilara. Rumangsa awake dhewe ra ana artine, lan ora precaya nek isa ngatasi masalahe dhewe.
Faktor nomer lima, mung mikir kepentingane anak. Kuwatir nek anake selot sengsara merga ibune pisah karo bapake.
Sabanjure, tetep tresna senajan nampa KDRT. Nalika kena KDRT terus, sing dipengini ora ucul saka kaningaya lumantar pegatan, nanging pengin bojone malih, dadi wong welas asih.
Lan faktor nomer pitu, anggepan nek perkawinan kuwi barang sing luhur lan pegatan kuwi ala, ndhung nganti milih sengsara elah angger bebojoan, alahane pegatan.
Kanggone penulis, wong sing dingerteni milih mertahan bebojoan senajan terus-terusan dipilara, mung fenomena puncak gunung es ndhok tengah segara. Sing ketok, sing dingerteni, mung suithik. Tapi sak benere sing dha milih nyimpen perkara KDRT minangka wadi kuwi luwih mberah.
“Pura-pura bahagia” nek cara wong saiki. Apa maneh nek sing ekonomine gumantang saka wong lanang. Ha wong Lèsti Kêjora sing nyata-nyata ra gumantung ekonomine wae tah milih ngehi pangapura. Lek wis nyata-nyata palapurane entuk panyengkuyung saka warganet sisan!
Ndhok kene, bola-bali ana pawarta sing nyebut nek sakploke ana garmen, selot mberah wong wedok sing dha kendel rapak (pegatan sing diajukna wong wedok/cerai gugat). Rumangsa luwih menang dibandhing wong lanang. Pancen nyatane perkara rapak cacahe luwih mberah disbanding talak.
Nalika nanggepi pawarta ngene iki, wong pabrik garmen sing njaluk rapak entek amek dipaido warganet. Darani ora wedi kuwalat, wani karo wong lanang. Teka bener kanggone sing pancen menang-menangan sawise isa mbutgawe dhewe. Tapi apa ya kabeh? Penulis yakin ora sepiraa.
Awake dhewe ra tau reti kaya ngapa maune le dha usaha nyimpen wadi, merga ra pengin le nandang lara dingerteni wong liya. Isin nek wong liya nganti weruh saben dina dipilara pasangane.
Awake dhewe ora weruh, saka pitung faktor mau, saben-saben korban KDRT ngalami faktor sing ndi, lan pirang faktor. Mulane, nalika tetep ra isa gawe pasangane malih dadi wong welas-asih, kepeksa milih pisah. Perkara le rapak ngepasi wis isa mbutgawe dhewe, isa wae kuwi perkara liya.
Isa dilacak kok saka pawarta nggek emben. Wong ngajukna rapak iku kawit mbiyen luwih mberah dibandhing talak.
Kodrate wong lanang iku pancen luwih rosa dibanding wong wedok. Mulane kita ora reti sakjane le ngempet ora dha rapak ya wis mbuh pirang taun, le digawe lara at iwis sepira suwene. Nek wis ra betah, pura-pura bahagia meh piye?
*Sulismanto, warga Jepara.
