Ngapa Bayar Pajêk?

Dening: Sulismanto*
Mario Dandy Satriyo kondhang. Bocah kok isa bengise ngono. Cah cilik wis entek amek tanpa daya, tetep wae disiksa.
Jumbuh pituture para winasis. Anak polah, bapa kepradah. Jalaran pokale anake, Rafael Alun Trisambodo, dipecat saka jabatane ndhok Ditjen Pajak. Menteri Keuangan Sri Mulyani banjur dhawuh bandha donyane Trisambodo dipriksa. Kebeneran wae sawise warganet kasil mbukak bandha donyane Trisambodo ora kaya wajare pejabat Ditjen Pajak.
Ing kalangan warganet, ana tembung Kemensul: Kementerian Sultan, kanggo nyindhir tunjangan pegawe Kemenkeu (kalebu Ditjen Pajak) sing matikel-tikel dibandhing pegawe liya. Nanging tetep wae, bandha donyane Trisambodo sing nganti Rp56 miliar, ora tinemu nalar. Iku sing marai Bu Sri Mulyani dhawuh dipriksa.
Apa maneh pirsa solah bawane Dandy sing gumedhe. Pamer bandha ndhok medhia sosial. Ugal-ugalan numpak montor Harley Davidson, nganti gawa Jeep Rubicon sing jebul ora dibayar pajeke.
Mulane warganet gregeten. Apa maneh, ana 13 ewu luwih pegawe Kemenkeu durung setor LHKPN (Laporan Harta Kekayaan penyelenggara Negara). “Ngono, kok, gawene urak-urak warga kon ngisi SPT taunan,” jare warganet sing dha mangkel.
Durung meneh, warga ijik dha kelingan perkara mafia pajek Gayus Tambunan lan penyelewengan pajek liyane.
Mulane saiki perkarane mrembet separan-paran. Indonesia melu cilaka. Iki dina, akeh wong dha ra precaya mbayar pajek. Iki pangandikane Wakil Presidhen Kiyai Ma’ruf Amin, lo.
Ha kepiye Wapres ora sumelang? Saben wektu warga diurak-urak tertib bayar pajek, jare kanggo mbangun Indonesia. Jebul pejabat pajek sakepenake dhewe.
Saiki, ngapa tah bayar pajek?
Pajek ya kanggo mbangun Indonesia, lah. Kanggo penulis, tetep wae kewajiban pajek kudu dibayar. Nyatane, sumber utama pembangunan pancen pajek. Taun wingi, total realisasi pendapatan negara Rp2.626,4 triliun. Saka total iku, penerimaan perpajakan Rp2.034,5 triliun. Nek ra mbayar pajek terus Indonesia mbangun karo apa.
Wis wajibe warga negara mbayar pajek. Ora kabeh pejabat lan pegawe pajek kaya Trisambodo lan Gayus Tambunan.
Penulis kelingan wedaran wayang saka swargi dhalang Ki Seno Nugroho nalika Bratasena utawa Werkudara, ape golek Tirta Pawitra Mahening Suci ing telenging samudra. Iku kanggo srana, sarat entuk sampurnaning ngelmu jaya kawijayan saka gurune, Begawan Dorna.
Sang ibu Dhewi Kunthi lan para dulur Pandhawa nuturi, nek iku mung rekadayane Pandhita Dorna. Kurawa lumantar Begawan Dorna, arep gawe sirnane Werkudara supaya menang ing perang Bharatayudha.
Nalika mbacutake mlebu ing telenging segara, Werkudara mung niat nglakoni kewajibane siswa: nurut marang dhawuhe gurune. Dene nek nyatane Dorna ngapusi, lah entuk piwalese dhewe.
Ing pungkasan crita, Bratasena, ya Werkudara, ora tinemu ajal. Nanging ngukup pitutur saka Bethara Ruci nek Tirta Pawitra Mahening Suci iku ora srana jaya kawijayan. Nanging perlambang ngelmu Kasampurnan Sangkan Paraning Dumadi, Manjing Suruping Surya.
Ing tembe, Werkudara lan para Pandhawa menang perang Bharatayuda. Dene Begawan Dorna entuk piwalese dhewe bareng karo kalahe sata Kurawa.
Ngilo saka lakon wayang “Dewa Ruci” iku, ya wis, ayo tetep mbayar pajek. Nek ijik ana Trisambodo lan Gayus Tambunan liyane, yo wis, lah entuk piwalese dhewe.