Oleh : Sunardi, KS
Kentole Mbok Mi (mbokdheku) iku tau bolong ditembus pelurune penjajah Jepang. Saka kentol mburi tembus kentol ngarep. Tatune isih ana, isih ketok cetha. Nalika aku ijeh cilik kentol sing tatu tilak peluru mau kerep dakgawe dolanan. Takkuwik-kuwik nganggo pucuk driji panuduh. Mbok Mi endha, tanganku disampluk. Jare kentole sing tatu iku nek dikuwik-kuwik isih krasa lara.
Nalika aku cilik, ponakane sing paling ruket ya aku dhewe. Adhi-adhiku cacah loro, ora patia cedhak karo Mbok Mi. Sing untung ya aku, jalaran Mbok Mi iku gaweane, dhek ijeh nom, dodol jajan. Dadi aku sing paling wareg mangan jajan. Jajan mau rupa ondhe-ondhe, lopis lan liya-liyane, nggawe dhewe terus didol ing pasar Mayong.
Tatune kentole Mbok Mi mau wis suwe banget, wis puluh-puluhan tahun lawase. Nanging yen diulik-ulik tetep krasa lara. Dakbayangake, Mbok Mi banjur kaya-kaya nandhang lara puluh-puluhan taun, gara-gara ditatoni penjajah Jepang.
Daktakokake, geneya kok pelurune penjajah Jepang nganti bisa kena kentole Mbok Mi? Jawabe Mbok Mi, jare kena peluru nyasar. Mbok Mi entuk istilah ‘peluru nyasar’ mau jare saka penjajah Jepang kala semana.
Nek dinalar, peluru nyasar iku nek lagi ana perang, terus ana wong liwat utawa cedhak lokasi perang. Dadi peluru mau kanggo musuh perang, orak kanggo rakyat jelata. Nek peluru mau ujug-ujug kok kena rakyat jelata, iku sing diarani ‘peluru nyasar’ Peluru sing kesasar. Kamangka nalika kentole Mbok Mi mau kena peluru, dina iku ora ana perang. Dadi istilah ‘kentole Mbok Mi kena peluru nyasar’ iku muk istilah akal-akalan ae. Mbok Mi diakali Jepang. Supaya Jepang orak dituduh salah.
Nok kesempatan liya, Mbok Mi tau crita, jare nalika ana penjajahan Jepang, meh saben dina ana peluru sesliweran, iku wis biyasa. Orak muk nek ana perang ae, utawa nek pas lagi nguber musuh ae. Kaya-kaya penjajah Jepang iku senengane pancen dolanan peluru. Utawa sengaja nguculake peluru-peluru kanggo neror pendhudhuk pribumi. Supaya padha wedi lan manutan. Ora bakal nglawan.
Nanging nek pas kena menungsa, kena wong pribumi, pehak Jepang ya orak rumangsa wedi, orak rumangsa kleru. Wong ya orak ana sangsine. Jepang padha Jepange kaya-kaya bebas hukum, nek ana sing nglakoni salah, ing jaman Jepang njajah nuswantara. Nrunyam sing banget-banget.
Penjajahan
Ana ing Bumi Nuswantara suwene Jepang ibarat muk sakumur jagung. Tegese muk sedhiluk. Muk 3,5 taun. Wektu semono iku diarani muk sedhiluk yen kabandhing Landa ana ing Bumi Nuswantara suwene nganti 350 taun, tikel satuse.
Bayangna 350 taun dijajah Landa. Nek rata-rata umur-umurane wong Indonesia iku 70-an taun ateges nganti limang generasi. Kamangka akeh-akehe bangsa kita orak tekan umur 70-an taun umure. Dadi isa uga nganti nem utawa malah pitung generasi. Bayangna.
Pitakone saiki ; Bangsa Landa njajah Nuswantara kok nganti semono suwene. Sebabe apa? 1). Landa kagolong orak patia kejem. Dadi istilahe, bangsa kita isih bisa toleransi. Jalaran orak patia kejem banjur bangsa kita orak duwe niyat nglawan. Seje nek karo Jepang.
Manut critane bapakku almarhum, sing uga tau sekolah nok jaman penjajahan Landa, sekolah wektu iku (wektu isih jajahan Landa) jare malah entuk dunduman susu. Bentuke susu wujud kristal. Orak susu cair. Rasane utawa ambune prengus banget, jalaran susu tulen. Tulen iku orak sekedar asli. Mula bocah-bocah sing padha entuk jatah susu akeh sing ora doyan, jalaran saking prenguse susu.
Malah, isih manut critane bapakku, nok jaman penjajahan Landa, nyambutgawe sedina kena kanggo mangan telung dina. Lho kok bisa, kok isa si? Piya tah?
Nalare kepriye? Sebab nalika jaman penjajahan arang wong wani metu nyambutgawe adoh-adoh. Nek ana sing wani nekat, pengasilane banjur dadi akeh. Nek jaman saiki nyambutgawe apa ae, apa maneh nganti pengasilane gedhe, wah kaya-kaya rebutan. Rebutan kere? Bapakku kagolong pawongan sing kendel. Dadi wong kendel mesthi ae ana resikone.
Nalika bapak bakulan ring Semarang, dodolan grabah, kuwali, kendhil, paso sakpiturute, nok tengah-tengah perjalanan dicegat Landa lagi patrol. Bapak didakwa mata-mata RI. Bapak banjur diukum tanpa proses dawa-dawa, diukum dipepe setengah dina. Kepanasen. Rumangsa ngelak banjur njaluk ngombe. Nanging muk trima disirati banyu saka kadohan.
Lha, bocah-bocah saiki kok malah ora entuk jatah susu. Ya embuh. Mbokmenawa yen saben bocah sekolah entuk susu, we sepira danane kanggo nyawisi tuku susu.
Iku alasan geneya kok Landa nganti suwe anggone njajah kita. Sing angka 3). Penjajahan Landa nganti suwe isa uga ing jaman semana saking nrimane bangsa-bangsa kita. Sebabe apa? Ya embuh jawabe golekana dhewe.
Dadi, isih manut critane bapakku, kekejemane Landa iku isih kegolong orak sepiroa nek kabandhing kekejemane penjajahan Jepang. Mula Jepang muk Sakumur jagung ana kene. Rakyat, senajan ngelih lan ringkih, nglawan, saking orak betahe urip rekasa, kesiksa.
Lha nalika dijajah Jepang rakyat mangan sega wae dilarang. Kamangka olehe nandur-nadur pari dhewe. Jarene Jepang iku kerep nggledhah omah-omahe rakyat. Nek konangan duwe sega, sing duwe omah nyimpen sega digawa ring markas Japang. Diapakna? Ya disiksa. Bayangna, kejeme Jepang. Nanging Jepang jaman semana lho ya. Nalika isih njajah.
Kamanungsan (Kemanusiaan)
Nalika jaman penjajahan, kamanungsan (kemanusiaan) wis ora ana ajine. Ajining menungsa kapara luwih aji godhong jati garing. Kanggone sing dijajah, wis ora ana menungsa sing di-uwong-ake. Menungsa, kejaba luwih aji godhong jati garing, uga luwih aji (nyuwun sewu) asune. Sebabe apa, asu isih dirangsum mangane, dicawisi pangan, supaya ora keluwen, ora kaliren. Nanging tumrape menungsa sing lagi dijajah, kena-kena sing lagi njajah mbatin, nek kowe arep modar, modara.
Nek wis ngono berarti menungsa sing lagi njajah iku ateges wis metu saka kodrate. Kodrate anggone dadi menungsa. Sebab pawongan sing lagi njajah wis mesthi kejeme. Senajan kekejemane mau ana sing ora nganti nemen, ana sing ora patia, uga ana sing kejem banget-banget.
Dadi mulakna, awake dhewe kudu gedhe banget syukure marang Gusti Kang Murbeng Kuwasa. Jalaran Gusti wis paring kamardikan marang bangsa saha negara kita, negara Republik Indonesia. Tanpa anugrah-E Gusti sengara bisa merdika. Senajan wis diusahani, diperjuwangna dening para-para pahlawan kita. Nanging pungkasane wewenang tetap ana ing Astane Gusti. Pengeran Kang Maha Kuwasa.
Saiki bangsa saha Negara Indonesia wis merdika. Kita mung kari njaga, supaya kamardikan iki tetep lestari. Ora bakal ana maneh penjajahan. Lan kaya sing wis padha dipahami bebarengan, penjajah iku satemene ora mung seje bangsa wae. Ora mung kudu wong asing, seje negara wae.
Penjajahan iku bisa dilakoni dening sapa wae, karo sapa wae. Lan penjajahan iku bisa maneka cara. Mula kamardikan kudu tansah direksa. Carane mesthi wae, aja nganti paweh kalodhangan utawa kesempatan karo sapa wae sing nganti seneng sawenang-wenang marang liyane. Aja nganti ana pawongan (oknum) sing seneng nguwasani pawongan liyan, kanthi cara meres, gawe rekasane liyan. Pawongan liyan iku banjur kaya-kaya ora bisa polah, ora bisa omber laku apa wae.
Apa bisa kelakon ana pawongan sing kaya ngono iku. We ladalah. Amat sangat bisa. Lan jalaran penjajahan iku laku kleru, bisa uga sengaja disamar-samar. Tumrap sing lagi dijajah, kaya-kaya ora wani mbeberake. Nuwun***
Penulis adalah sastrawan tinggal di Jepara
